1Cor 5 | MED | STEP | Akup ik kᵾpkᵾ onum mbila, moⱡᵾp punt ei, enim Korin kona ila wamp mormin ei nga ruk ting ila, wu amp wapra rui uⱡ kit ei nga minal penᵾm. Uⱡ ei, rumbᵾⱡ ila mormin wamp mbᵾ ndi, iti natᵾtmᵾn mel enim enmin. Wu ti ruk moⱡpa, elim nga tipam nga amp ei, tᵾpa mepa andnᵾm, ninmin ik ei kupa ye!

1 Corinthians 5

Wamp Mbᵾ Uⱡ Ⱡawa Kit Mat Etᵾng

1 Akup ik kᵾpkᵾ onum mbila, moⱡᵾp punt ei, enim Korin kona ila wamp mormin ei nga ruk ting ila, wu amp wapra rui uⱡ kit ei nga minal penᵾm. Uⱡ ei, rumbᵾⱡ ila mormin wamp mbᵾ ndi, iti natᵾtmᵾn mel enim enmin. Wu ti ruk moⱡpa, elim nga tipam nga amp ei, tᵾpa mepa andnᵾm, ninmin ik ei kupa ye! 2 Uⱡ puⱡ nant ila, enim ik tᵾk roi nduing? Enim ik tᵾk roi ndui uⱡ ei, pendᵾk kelik, numan kit pilik, pipil kulk itᵾi! Uⱡ ⱡawa em wu ei, enim nga mormin mou ila, muⱡi nᵾmbᵾⱡangga nᵾk, tᵾk ekit ndᵾi! 3 Akup ei kᵾn, na enim kᵾn kᵾng orunga, rup rop muⱡi nᵾmᵾnt ndam kep, na nga muⱡnga min ei, enim kᵾn rup rop mor. Na nga muⱡnga min ei, enim kᵾn kupa moⱡᵾp kᵾn, uⱡ kit pem wu ei nga ik ei, Nuim Jisas nga mbi ila, kᵾmp tᵾp pilip pora ndup mor. 4 Enim ok, tᵾk tenda etᵾk, mou ti rᵾi! Wote na nga muⱡnga ei, enim kᵾn muⱡimp ila nga Nuim Jisas nga ronduⱡ ei omba, tᵾn kᵾn kup itangga! Wote uⱡ kit em wu kit ei, enim nga Got nga mbi paka kai rok mormin mou ila, tᵾk ekit nduk, Seitan nga ki ila tindangina, kᵾng orunga etpa kit mundangga! Wote, Nuim ei nga Ui Ou ila, wu kit moⱡum ei nga min ei, etpa tᵾmba!

6 Wote, enim kai mormin nᵾk, kᵾng orunga mek oⱡa punmᵾn uⱡ ei, uⱡ kit wei ei enmin. Wamp tenda ti kandᵾk, kont itangina, uⱡ kit mbᵾ etpa, mint pum ndam, plawa ila yis mundᵾrmin uⱡ ni mel pemba ei, pᵾnmᵾn muna mon? 7 Enim kun kai muⱡmin nᵾk, piling ndam, enim kᵾn uⱡ kit yis mel petᵾm ei, tᵾk ekit ndᵾi! I etᵾk kᵾn, enim kun kai muⱡing. Nambuⱡ emel, Kraist Got nga Sipsip Waⱡ ni, tᵾn nga nimba kᵾn, elim ndi, elim wak ropa, mbun mindil mbᵾ tᵾpa kurum. 8 Ei nga, tᵾn nga etpa ti rᵾng nuimin ei nga, ui pindmin ila bret ila yis pi nᵾpangga nᵾmin. Ei nga, uⱡ kupa eng nui mbᵾ itmin. Wote, uⱡ kit mbᵾ, bret ila yis petᵾm uⱡ ei mel, tᵾn iti nᵾtmᵾn mon!

9 Unt enim kᵾn mon ti rop ngur nila, ik ei mel nᵾmp ngur. Wapra rui uⱡ kit etᵾm wamp ti kᵾn, kup iti nᵾtᵾi! 10 Akup ik ei, nᵾmp kᵾn, mᵾi kona wamp rᵾⱡaip ekit orunga kat, mana andᵾk wapra ronmin, muna kandpa kum pindi wamp mana kindᵾp nok, muna got kol mbᵾ kᵾn, mbi paka ronmᵾn wamp kᵾⱡ kᵾn, ik ti, ni nanᵾnt, mon! Mᵾi kona wamp rᵾⱡaip kᵾⱡ, wak ruing ndam, ya mᵾi kona kᵾmp kᵾm wak ruing mel petᵾm. 11 Wote na ndi, mon rop ngᵾnt ik ei, ya wu ti ndi, elim enim nga ᵾngᵾn ei nimba, wote int mba, wapra rorum, muna ik kol ropa mel yant titim, muna got kol mbi paka rorum, muna ik mbuldung ni nᵾndᵾtᵾm, muna nu nomba kekilip rorum, muna kindᵾp norum wamp i etpa ei kᵾn, rᵾp rui nᵾrᵾi! Wote, rᵾng tenda ila molk, nui nᵾnᵾi ku.

12 Ei kᵾn, na ndi, mᵾi kona wamp rᵾⱡaip ekit orunga mormin kᵾⱡ, kapⱡa kᵾmp ti natᵾnt. Got ndi, wamp mbᵾ kᵾmp tᵾmba. Wote, enim int Got nga mbi paka rok mormin ruk ting ila, ⱡawa ei mel em wamp ei, kapⱡa kᵾmp tᵾk kandᵾk, tᵾk ekit ndᵾi! Buk Wingti ila nᵾtᵾm ei mel, “Wu mbo kit ei, tᵾk ekit ndᵾi!” nᵾtᵾm.